បាល់ទាត់៖ លោក ហុងដា ជឿជាក់ក្រុមកម្ពុជា ឈ្នះប៉ាគីស្ថាន

លោក Keisuke Honda អតីតអ្នកចាត់ការក្រុមបាល់ទាត់កម្ពុជា ជឿជាក់ថាក្រុមបាល់ទាត់ជម្រើសជាតិកម្ពុជា នឹងធ្វើបានល្អក្នុងជំនួបទល់នឹងម្ចាស់ផ្ទះ ប៉ាគីស្ថាន នាការប្រកួតជើងទី២នៃវគ្គជម្រុះជុំទី១ ពានរង្វាន់បាល់ទាត់ជើងឯកពិភពលោកឆ្នាំ២០២៦(FIFA World Cup Qualification 2026)-AFC នៅក្នុងកីឡដ្ឋាន Jinnah Sport ក្រុងអ៊ីស្លាម៉ាបាត ប្រទេសប៉ាគីស្ថាន ថ្ងៃទី១៧ ខែតុលា ឆ្នាំ២០២៣។ សំណេរនៅលើគេហទំព័រហ្វេសប៊ុកផ្លូវការរបស់ខ្លួនបង្ហោះនៅថ្ងៃទី១៧ ខែតុលា ឆ្នាំ២០២៣(កម្ពុជា) លោក ហុងដា បានសរសេរលើកទឹកចិត្តដល់ក្រុមជម្រើសជាតិកម្ពុជាឱ្យទទួលបានលទ្ធផលល្អក្នុងការប្រកួតវគ្គជម្រុះ FIFA World Cup ថ្ងៃនេះ។ «សូមធ្វើឱ្យបានល្អក្នុងការប្រកួតមួយនេះ។ អ្នកអាចធ្វើបានកម្ពុជា»។ សារលើកទឹកចិត្តខ្លីដ៏មានអត្ថន័យក៏មានអមដោយ Emoji រូបបាល់ទាត់ និងទង់ជាតិកម្ពុជា។   ទោះបីបានចាកចេញពីក្រុមជម្រើសជាតិកម្ពុជាហើយក៏ពិតមែនតែទឹកចិត្តស្រលាញ់វិស័យកីឡាបាល់ទាត់កម្ពុជា សម្រាប់លោក ហុងដា នៅតែមានក្នុងចិត្តលោករហូត។ អ្នកចាត់ការទូទៅក្រុមកម្ពុជា Keisuke Honda បានចាកចេញពីក្រុមជម្រើសជាតិកម្ពុជាក្រោយបញ្ចប់ព្រឹត្តិការណ៍កីឡាស៊ីហ្គេមនៅកម្ពុជា ឆ្នាំ២០២៣។   គួបញ្ជាក់ថា សម្រាប់ការប្រកួតបាល់ទាត់រវាងម្ចាស់ផ្ទះ ប៉ាគីស្ថាន និងភ្ញៀវគោព្រៃកម្ពុជា នឹងចាប់ផ្តើមនៅម៉ោង ៤ល្ងាច ថ្ងៃទី១៧ ខែតុលា ឆ្នាំ២០២៣ នៅក្នុងកីឡដ្ឋាន Jinnah Sport ក្រុងអ៊ីស្លាម៉ាបាត ប្រទេសប៉ាគីស្ថាន ថ្ងៃទី១៧ ខែតុលា ឆ្នាំ២០២៣៕